Şarj stansiyası seçərkən verilən ən çətin sual budur: 7 kVt, yoxsa 22 kVt? Bahalı olan həmişə yaxşıdır məntiqi burada işləmir — çünki 22 kVt-lıq cihazın işləməsi üçün iki şərt lazımdır və bir çox halda onların heç biri yerinə yetmir.

Birinci şərt: evinizdə 3 faza var?

22 kVt gücündə AC şarj yalnız 3 fazalı (380 V) şəbəkədə mümkündür. Azərbaycanda mənzillərin və fərdi evlərin böyük əksəriyyəti isə 1 fazalıdır (220 V).

1 fazalı şəbəkədə maksimum güc 32 amperdə təxminən 7,4 kVt təşkil edir. 22 kVt-lıq cihaz alsanız da, o, 1 fazalı xəttdə yalnız 7 kVt verəcək — yəni artıq ödədiyiniz pul boşa gedəcək.

Necə yoxlamaq olar?

• Sayğaca baxın. 3 fazalı sayğacda adətən üç gərginlik göstəricisi və daha çox klemma olur.
• Sipərdəki avtomatlara baxın. Giriş avtomatı üç qoşa dilli (3P) formadadırsa, 3 faza var.
• Naqilləri sayın. Evə üç qalın faz naqili + sıfır gəlirsə, 3 fazadır.
• Ən dəqiq yol — mütəxəssisi çağırmaq. ELCAR bu baxışı pulsuz həyata keçirir.

İkinci şərt: avtomobiliniz 22 kVt qəbul edir?

Bu, çox vaxt gözdən qaçan məqamdır. AC şarjda sürəti təyin edən yalnız stansiya deyil — avtomobilin daxili şarj cihazı (on-board charger) da limitdir. Avtomobil öz limitindən artığını qəbul etmir.

Daxili şarj cihazının gücü	Kimlərdə rast gəlinir
3,3–3,7 kVt	Köhnə nəsil və büdcə modelləri
6,6–7,4 kVt	Ən geniş yayılmış hal
11 kVt	Bir çox Avropa modeli (3 fazalı)
22 kVt	Nadir — əsasən premium və ticari modellər

Yəni 22 kVt-lıq stansiyanın tam gücündən yararlanmaq üçün həm 3 faza, həm də 22 kVt dəstəkləyən avtomobil lazımdır. Bu kombinasiya praktikada nadirdir.

Bəs 7 kVt kifayət edirmi?

Əksər ev istifadəçisi üçün — bəli. Sadə hesablama:

• 7,4 kVt × 9 saat (gecə) ≈ 66 kVts
• Bu, tipik elektromobilin sıfırdan tama qədər dolması deməkdir
• Gündəlik 50–100 km sürən sürücü üçün cəmi 2–3 saat şarj kifayətdir

Avtomobil gecə saat 23:00-da qoşulub səhər 08:00-da tam hazır olur. Bu ssenaridə 22 kVt heç bir üstünlük vermir — hər iki halda səhər avtomobil doludur.

22 kVt nə vaxt doğrudan lazımdır?

• Ailədə iki elektromobil var və hər ikisi eyni gecədə şarj olunmalıdır
• Gündəlik yürüş 200 km-dən çoxdur — kuryer, taksi, satış nümayəndəsi
• Biznes obyektidir — otel, ofis, ticarət mərkəzi, avtopark. Burada avtomobil qısa müddət dayanır, sürət vacibdir
• Evdə onsuz da 3 faza var və avtomobil 11–22 kVt dəstəkləyir

3 fazaya keçmək nə qədər məntiqlidir?

Yalnız 22 kVt şarj üçün 3 fazaya keçmək çox vaxt özünü doğrultmur — həm əlavə xərc, həm sənədləşmə, həm də vaxt tələb edir. Amma evdə onsuz da güclü istehlakçılar varsa (isitmə sistemi, kondisionerlər, emalatxana), 3 fazaya keçid ümumi olaraq faydalıdır və şarj bunun əlavə bonusu olur.

Praktik tövsiyə

Vəziyyətiniz	Tövsiyə
1 faza, gündə 100 km-ə qədər	7 kVt wallbox
1 faza, tez-tez uzun yol	7 kVt wallbox + portativ cihaz
3 faza, avtomobil 11 kVt dəstəkləyir	22 kVt wallbox (11 kVt-da işləyəcək)
3 faza, iki avtomobil	22 kVt wallbox
Biznes obyekti	22 kVt AC və ya DC stansiya

Nəticə

Ən çox rast gəlinən səhv — lazım olmadığı halda 22 kVt almaqdır. İkinci ən çox rast gəlinən səhv isə cihazı alıb sonra sipərin buna hazır olmadığını görməkdir.

Hər ikisinin qarşısını almağın yolu sadədir: sifarişdən əvvəl pulsuz baxış təşkil edək. Mütəxəssisimiz sipəri, mövcud gücü və kabel yolunu yoxlayır, sonra dəqiq hansı cihazın uyğun olduğunu deyirik.